Bis Weihnochtn is nimma weid,
d’leid manan is a besinnliche zeid.
Dawei tummüns vo dort noch trent,
streitn um an jedn Cent.

Den schwoazn freitog hom ma nod,
de rua, de sogt scho pfiati god,
bevoast d’erste Kerzen anzund host,
dast as moi wida lost.

Oba Keks, jo Keks warn sche,
so a Keksal duat jo a kam weh,
a vanillekipferl in da Not,
bringt scho moi wos zruck ins Lot,

söba mochn is ned so in bei de leid,
wer Keks kauft, jo der is gscheid,
Legal und EU Konform,
Keks noch Iso-Norm.

In gres und gwicht, und palmölfrei,
sonst kimt glei amoi die polizei,
najo daun kosts hoid glei amoi,
und des mitm teier werdn is a so a foi,

Wei Keks de kean oafoch dazua,
nur am börsl do drugts gnua,
najo do hüft nur mehr illegal,
Keksmafia Skandal.

Daun vercheck ma im großen Stil,
stott Drogn, Keks im Stroßndeal,
a weiß puiva is dort und do,
gsinda sand keks scho,

nu illegaler is da keks ausm internet,
am foto KI montiert adrett,
kaus a amoi gferli wern,
Salmonellen, jo hobts mi gern,

Mei liaba Schwan, do hüft nur ans,
a jedes Keks, a jedes klans,
muast da heud daun söba mochn,
und jetzt kina ma nu lochn.

Oba wer was, zur Rettung da nation,
de Kekssteier obzogn a vo da Pension,
Jo eh, wos wüst sunst no sogn,
I geh jetzt Zucker, Eier und Butta drogn.