Waun amoi ana wos dadat,
jo wo kamad ma denn do hi.
Waun amoi ana was sagat,
passiern duats eh nie.

Oba wos waun doch,
wos dadat ma daun?
Groß was des loch,
und bled dadat ma schaun.

Wos I mecht das ana dadat,
jo des kau i eich scho dazön,
das amoi ana ehrlich warad,
und sogt, I mog mi zur woi stöhn.

Wei, und des datat i gern hern,
mia is wichtig das uns olle guat geht,
I kümat mi hoid gern,
I bin ana der zu seim woat steht.

Ders für de soch dadat, ned fias göd,
mit am wia olle,
mit am gspia fiad leid und wöd,
des daugad mia volle.

Wos der dadat waun wos pasiat,
sogn leid es duat ma lad,
hobs ned bessa gwusst, fia eich probiat,
anstod das a d’woarheit umdraht,

Amoi ana der ned d’aundan schuid gibt,
sondan grod sted fia des wos a dau hod,
a wana ned oiwei richti ligt,
daun duat a weida, und biagts grod.

Füle dadatn umatrenz und schrein,
so a oasch, wer soidn des sein,
I dadat dann sogn, a echta, ohne Heilignschein,
bei dem wird hoid wossa ned zum wein,

so an dadat I ma wünschn, ehrlich woa,
oba obs so wen nu gibt was I ned,
nu dawei is mei hoffnung ned goa,
dadat doch ana moi wos, nu is ned z’spät.